Масоили кунунӣ ва дурнамои рушди ҳамкории Тоҷикистон ва Россия дар бахши сайёҳӣ зимни мулоқоти раиси Кумитаи рушди сайёҳии назди Ҳукумати Ҷумҳурии Тоҷикистон Камолиддин Муминзод бо муовини раиси Кумитаи Думаи давлатӣ оид ба сайёҳӣ ва рушди инфрасохторӣ сайёҳии Федератсияи Россия – Костенко Наталя Василевна баррасӣ гардид.

Дар мулоқот атрофи масъалаҳои густариши муносибатҳои дуҷониба дар соҳаи сайёҳӣ, омӯзиши таҷрибаи Россия ва ҷалби сармоягузорӣ дар ин самт табодули афкор сурат гирифт.

Қобили тазаккур аст, ки муовини раиси Кумитаи Думаи давлатӣ ҷиҳати иштирок дар Намоишгоҳи байналмилалии универсалии  «Тоҷикистон-2023» ба кишвари мо ташриф оварда, аз чанд мавзеи сайёҳӣ боздид намуд. Ӯ таассуроти хешро аз дидаҳояш рангин иброз дошта, рушди инфрасохтори муосир ва пешниҳоди хизматрасониҳои сайёҳиро қонеъкунанда арзёбӣ намуд.