Имрӯз дар доираи баргузории Семинари сайёҳии Осиёи Марказӣ раиси Кумитаи рушди сайëҳии назди Ҳукумати Ҷумҳурии Тоҷикистон Камолиддин Муминзод бо раиси Кумитаи сайёҳии Ҷумҳурии Ӯзбекистон Умид Шодиев дидору мулоқот намуд.

Раиси Кумитаи рушди сайёҳӣ пас аз изҳори миннатдорӣ барои истиқболи самимӣ, меҳмоннавозӣ ва дастгирӣ ҷиҳати баргузории Семинари сайёҳии Осиёи Марказӣ дар чаҳорчӯбаи 25-ум иҷлосияи Маҷмаи Умумии Созмони ҷаҳонии Сайёҳии Милали Муттаҳид дар шаҳри бостонии Самарқанд, иброз намуд, ки муносибатҳои неки ҳамҷавории роҳбарони олии сиёсии кишварҳои ба ҳам дӯсти Тоҷикистону Ӯзбекистон ба рушди соҳаи сайёҳӣ мусоидат намудааст.

Гӯфта Айни замон шумораи сайёҳони ӯзбек дар Тоҷикистон дар ҳоли афзоиш буда, ҷаҳонгардони Ӯзбекистон аз ҷиҳати ташриф ба кишвари мо дар радабандии давраи ҳисоботии нуҳмоҳа дар ҷойи аввал қарор доранд.

Раиси Кумита сайёҳии Ҷумҳурии Ӯзбекистон дар навбати худ таъкид намуд, ки кишварҳои ҳамҷавори Тоҷикистону Ӯзбекистон бо ҳам наздик шуда истодаанд ва пешниҳод намуд, ки ҷиҳати тақвияти ҳамкориҳои минбаъда дар соҳаи сайёҳӣ роҳандозии хатсайрҳои сайёҳии муштарак ба нақша гирифта шудааст. Дар ин замина, ҷонибҳо барои таҳияи хатсайрҳои муштараки гуногунсамти сайёҳӣ дар миқёси минтақаи Осиёи Марказӣ изҳори омодагӣ намуданд.

Дар поёни вохӯрӣ таъкид гардид, ки рушди соҳаи сайёҳӣ натанҳо дар баланд бардоштани сатҳи некуаҳволии сокинон, балки барои боз ҳам наздик намудани мардуми бо ҳам бародари тоҷику ӯзбек нақши барҷаста мебозад.