Имрӯз, 10 майи соли 2023 таҳти роҳбарии раиси Кумитаи рушди сайёҳии назди Ҳукумати Ҷумҳурии Тоҷикистон Камолиддин Муминзод ҷаласаи назоратии ҳафта баргузор гардид.

Тибқи тартиби корӣ дар маҷлиси назоратӣ фаъолияти воҳидҳои сохтории Кумита дар ҳафтаи гузашта, иҷрои босифат ва саривақтии ҳуҷҷатҳои назоратӣ, риояи интизоми меҳнат, таъмини босифати иштироки намояндагони Кумита дар намоишгоҳи байналмилалии сайёҳӣ дар шаҳри Риёзи Арабистони Саудӣ ва сафари кории роҳбарияти Кумита ва намояндагони соҳаи сайёҳӣ аз ҳисоби субъектҳои хизматрасони сайёҳӣ ба минтақаҳои Федератсияи Россия ҷиҳати ҷалби сайёҳон аз ин кишвар мавриди баррасӣ қарор дода шуданд.

Бо мақсади беҳтар намудани фаъолият дар соҳа аз ҷониби раиси Кумита ба роҳбарони воҳидҳои сохторӣ ҷиҳати иҷрои саривақтии супоришҳои Ҳукумати Ҷумҳурии Тоҷикистон, иҷрои нақшаву барномаҳои кории Кумита, иштироки фаъолона дар форумҳои сармоягузорӣ, намоишгоҳҳои байналмилалӣ, татбиқи босамари Лоиҳаи рушди сайёҳӣ, ҳамкории зич бо вазорату идораҳо, мақомоти маҳаллӣ ва ҷонибҳои ҳавасманд барои муаррифии бештару беҳтари иқтидорҳои сайёҳии ҷумҳурӣ дастурҳои мушаххас дода шуд.