Имрӯз дар Донишгоҳи байналмилалии сайёҳӣ ва соҳибкорӣ конфронси илмию амалӣ бахшида ба Рӯзи умумиҷаҳонии сайёҳӣ дар мавзуи “Масъалаҳои таъмини рушди устувори сайёҳӣ” бо иштироки васеи доираҳои сайёҳӣ доир шуд.

Чорабинии мазкурро Донишгоҳи байналмилалии сайёҳӣ ва соҳибкорӣ дар якҷоягӣ бо Кумитаи рушди сайёҳӣ ва Мақомоти иҷроияи ҳокимияти давлатии шаҳри Душанбе ташкил намуд.

Ҳамасола 27 сентябр дар саросари ҷаҳон Рӯзи умумиҷаҳонии сайёҳӣ таҷлил мегардад. Ин сана дар саросари ҷаҳон аз соли 1979 зери шиорҳои гуногуни соҳавӣ ҷашн гирифта шуда, ҳадафи он тарғибу ташвиқи сайёҳӣ, инъикоси бахши сайёҳӣ дар рушди иқтисоди ҷаҳонӣ ва тақвияти робитаҳои дӯстиву ҳамкорӣ байни кишварҳо ва халқиятҳои гуногуни олам мебошад.

Имсол ин рӯзи умуиҷаҳонии сайёҳӣ дар саросари олам зери шиори “Туризм ва дигаргунсозии устувор” ҷашн гирифта мешавад.

Қобили тазаккур аст, ки бо мақсади заминаи воқеӣ гузоштан ва ворид шудани соҳаи сайёҳии кишвар ба бозори ҷаҳонии сайёҳӣ Ҷумҳурии Тоҷикистон 27 – ноябри соли 2007 дар шаҳри Картахена Индаси Ҷумҳурии Колумбия дар ҷаласаи 54 Асамблеяи Созмони умумиҷаҳонии сайёҳии Созмони Милали Муттаҳид ҳамчун узви комилҳуқуқи ин созмони бонуфӯз пазируфта шуд.

Узвияти мамлакати мо дар ин сохтор, ки яке аз 12 оҷонсиҳои Созмони Милали Муттаҳид ба ҳисоб меравад, дар баробари омӯзиши таҷрибаи пешрафтаи ҷаҳонӣ ва иштирок дар ҷараёни ҳаллу фасли масоили рӯзмараи соҳа, барои ташаккул ва дар оянда мустаҳкам кардани имиҷи ҷумҳурӣ ҳамчун кишвари сайёҳӣ бениҳоят манфиати зиёд мерасонад.

Инчунин, узвият ба ин созмон барои гузаронидани таҳлилҳои маркетингӣ ва муайян кардани захираву имконоти кишвар дар бахши сайёҳӣ шароити мусоидеро фароҳам хоҳад овард.

Кумита аз марҳилаи шомилшавӣ ҳамкориҳои судмандро бо роҳбарият ва коршиносони Созмони умумиҷаҳонии сайёҳӣ ҷоннок намуда истодааст.