2 майи соли 2024 дар шаҳри Бокуи Ҷумҳурии Озарбойҷон нахустин форуми туроператорони давлатҳои аъзои Созмони ҳамкории иқтисодӣ (СҲИ) бо иштироки намондагони мақомотҳои сайёҳии кишварҳои узви СҲИ ва ширкатҳои сайёҳии кишварҳои аъзои СҲИ баргузор гардид, ки дар кори он намояндагони Кумитаи рушди сайёҳӣ бо ширкатҳои сайёҳии ватанӣ низ иштирок намуда истодаанд.
Форуми мазкур бо мизбонии Агентии давлатии сайёҳии Озарбойҷон дар мавзуи “Туризм дар минтақаи СҲИ: имкониятҳо ва мушкилотҳо” ташкил гардида, бо суханронии дабири кулли СҲИ ҷаноби Хусрав Нозирӣ ифтитоҳ гардид.
Дабири Куллӣ СҲИ ҷаноби Хусрав Нозирӣ дар суханронии худ ба Агентии давлатии сайёҳии Озарбойҷон барои дастгирӣ ва баргузории чорабинӣ изҳори миннатдорӣ намуда, қайд кард, ки баргузории чунин чорабиниҳо барои рушди ҳамкориҳо дар соҳаи сайёҳӣ миёни кишварҳои узви СҲИ такони ҷиддӣ мебахшад. Инчунин аз ҷониби дабири кулли СҲИ ҷаноби Хусрав Нозирӣ маълумот вобаста ба рушди сайёҳӣ дар минтақаи СҲИ ва пешрафти соҳаи сайёҳӣ дар Озарбойҷон ба иштирокчиён дода шуд.
Баъд аз суханрониҳои меҳмонони воломақом нахустин форуми туроператорони давлатҳои аъзои СҲИ, ки бори аввал ташкил гардида истодааст, бо ташкили панелҳо ҷиҳати муҳокимаи масъалаҳо аз ҷониби коршиносон идома ёфт.
Дар кори панелҳо аз ҷониби коршиносони соҳаи сайёҳии кишварҳои узви СҲИ тамаркуз вобаста ба аҳамияти ҳамкорӣ дар таҳияи бастаҳои сайёҳи муштараки давлатҳои аъзои СҲИ, аз ҷумла ECO Duo, ECO Multi, ECO Nature ва Capital Tourism ECO-ро мавриди муқокима қарор доданд. Дар муҳокимаҳои панелӣ ба стратегияҳои таҳия, татбиқ ва маркетинги хатсайрҳо, аҳамияти ҷалби муштариёни маҳаллӣ ва ҷавонон, тавлиди талабот ва бастани шартномаҳои мувофиқ дода шуд.
Ёдрасон бояд кард, ки нахустин форуми туроператорони давлатҳои узви Созмони ҳамкории иқтисодӣ рӯзи 2 майи соли 2024 дар шаҳри Бокуи Ҷумҳурии Озарбойҷон баргузор гардида, то санаи 4 майи соли 2024 идома хоҳад ёфт.