Ҳайати Ҷумҳурии Тоҷикистон иштироки худро дар Намоишгоҳи байналмилалии сайёҳии ITB Berlin 2026, ки рӯзҳои 3–5 марти соли 2026 дар шаҳри Берлин баргузор гардид, бо натиҷаҳои назаррас ҷамъбаст намуд.

Намоишгоҳи мазкур яке аз бузургтарин чорабиниҳои байналмилалӣ дар соҳаи сайёҳӣ маҳсуб ёфта, ҳамасола намояндагони мақомоти давлатӣ, ширкатҳои пешбари сайёҳӣ, ташкилотҳои байналмилалӣ ва сармоягузоронро аз кишварҳои гуногуни ҷаҳон ба ҳам меорад.

Иштироки Ҷумҳурии Тоҷикистон дар ин чорабинии бонуфуз бо дастгирии Ҳукумати Ҷумҳурии Тоҷикистон таъмин гардида, Кумитаи рушди сайёҳӣ ҳамчун мақоми ваколатдори давлатӣ дар соҳаи сайёҳӣ ҳамоҳангсозии фаъолияти ҳайати кишварро ба роҳ монд.

Дар ташкили иштироки ҳайати Тоҷикистон саҳми назарраси Сафорати Ҷумҳурии Тоҷикистон дар Олмон ба мушоҳида расида, сафорат бо мусоидат дар масъалаҳои ташкилию дипломатӣ, барқарор намудани робитаҳо бо доираҳои тиҷоратӣ ва сайёҳии Олмон ва ҷалби таваҷҷуҳи ширкатҳои хориҷӣ ба имкониятҳои сайёҳии Тоҷикистон нақши муҳим гузошт.

Меҳмони фахрии гӯшаи Тоҷикистон дар намоишгоҳи ITB Berlin Кристиан Гроссе (Christian Grosse) рӯзноманигор, блогер ва фаъоли ҷамъиятии олмонӣ мебошад. Ӯ муаллифи маҷаллаи тиҷоратии«NewsMark» буда, мақолаҳои ӯ доираи васеи мавзӯъҳои иқтисодӣ, сайёҳӣ ва фарҳангиро фаро мегиранд.

Дар ҳошияи намоишгоҳи байналмилалии сайёҳии ITB Berlin 2026 дар гӯшаи сайёҳии Тоҷикистон, Сафири Фавқулода ва Мухтори Ҷумҳурии Тоҷикистон дар Ҷумҳурии Федеративии Олмон Имомуддин Сатторов, ҳамзамон бо академик, муҳаққиқ ва коршиноси эътирофшудаи байналмилалӣ дар соҳаи сайёҳӣ Мирослав Рончак, ки зиёда аз 30 сол таҷрибаи корӣ дар соҳаи сайёҳии байналмилалӣ дорад, суҳбат намуданд.

Ҷонибҳо барои ташкили Форуми муштараки сайёҳии сатҳи баланд дар шаҳри Душанбе дар соли 2027 бо мақсади ҷалби сайёҳон аз Олмон ва дигар кишварҳои Аврупо инчунин, роҳандозии барномаву хатсайрҳои нави сайёҳӣ аз минтақаҳои зебоманзари Тоҷикистон ба мувофиқа расиданд.

Қобили тазаккур аст, ки дар доираи намоишгоҳ имкониятҳои сайёҳии Ҷумҳурии Тоҷикистон, аз ҷумла захираҳои нодири табиӣ, мавзеъҳои таърихию фарҳангӣ, сайёҳии кӯҳнавардӣ ва экологӣ, инчунин ҳунарҳои мардумӣ ва анъанаҳои миллии кишвар ба таври васеъ муаррифӣ карда шуданд.

Ҳамзамон, ҳайати Тоҷикистон бо намояндагони ширкатҳо ва ташкилотҳои байналмилалии соҳаи сайёҳӣ мулоқоту гуфтушунидҳои судманд анҷом дода, масъалаҳои густариши ҳамкориҳои байналмилалӣ, роҳандозии сафарҳои сайёҳӣ ва ҷалби сармоя ба соҳаи сайёҳии кишварро баррасӣ намуданд. Дар ҳошияи намошгоҳ ширкатҳои сайёҳии ватанӣ бо ҳамтоёни хеш беш аз 20 барномаи ҳамкорӣ ба имзо расониданд.

Аз рӯи мушоҳидаҳо гӯшаи сайёҳии кишварро дар давоми се рӯзи чорабинӣ беш 3000 ҳазор меҳмонону сайёҳон ва дӯстдорони сайру саёҳати Тоҷикистон дидан намуданд.

Қобили зикр аст, ки иштирок дар ITB Berlin 2026 ба муаррифии минбаъдаи имкониятҳои сайёҳии Тоҷикистон дар бозори байналмилалӣ, таҳкими ҳамкориҳои судманд бо шарикони хориҷӣ ва ҷалби бештари сайёҳони хориҷӣ ба кишвар мусоидат менамояд.