Имрӯз, 6 феврал, дар Мақомоти иҷроияи ҳокимияти давлатии шаҳри Душанбе ҷаласаи Гурӯҳи кории байниидоравӣ вобаста ба баргузории Фестивали байналмилалии сайёҳии «Наврӯз – мероси фарҳангию ҷаҳонгардӣ – 2026 доир карда шуд.

Фестивал дар асоси Нақшаи чорабиниҳо, ки бо амри Президенти Ҷумҳурии Тоҷикистон аз 2 январи соли 2026, №952 «Дар бораи ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва ҳунарҳои мардумӣ дар Ҷумҳурии Тоҷикистон барои соли 2026» тасдиқ шудааст, баргузор мегардад.

Дар ҷаласа муовини Сарвазири мамлакат Дилрабо Мансурӣ, роҳбарияти Кумитаи рушди сайёҳӣ ва Мақомоти иҷроияи ҳокимияти давлатии шаҳри Душанбе, намояндагони вазорату идораҳо, мақомоти иҷроияи ҳокимияти давлатии вилоятҳо, шаҳру ноҳияҳои кишвар ва дигар масъулин иштирок намуданд.

Зимни ҷаласа масъалаҳои марбут ба омодагӣ ва баргузории Фестивали байналмилалии сайёҳии «Наврӯз – мероси фарҳангию ҷаҳонгардӣ – 2026», аз ҷумла таҳияи барномаи фарҳангӣ, ҷалби сайёҳони хориҷӣ, муаррифии имкониятҳои сайёҳии мамлакат, таъмини ҳамоҳангии фаъолияти ниҳодҳои масъул ва истифодаи самараноки инфрасохтори сайёҳӣ мавриди баррасӣ қарор гирифтанд.