Ҳамватанони азиз ва ҳамкасбони гиромӣ,

Дар ин рӯзҳои фараҳбахш Шуморо ба муносибати Соли нави мелодии 2026 табрик ва муборакбод менамоям.

Дар воқеъ, соли 2025 барои мардуми кишвари азизу маҳбубамон ҳамчун соли хотирмон ва пур аз муваффақияту комёбиҳо буд. Маҳз дар партави сиёсати дурандешонаи Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон дар ҳама соҳаҳои хоҷагии халқ пешравиҳои назаррас, вусъати корҳои созандагию ободонӣ, ривоҷи дӯстию робитаҳои ҳамкории судманд ба вуқуъ пайвастанд.

Дар партави сиёсати созанда ва бунёдкоронаи Пешвои миллат соҳаи сайёҳӣ пайваста рушд ёфта, Ҷумҳурии Тоҷикистон дар ин самти муҳими стратегӣ ба дастовардҳои назаррас ноил шуд ва дар арсаи байналмилалӣ соҳиби обрӯю эътибори хосса гардид.

Бо дастгирии Ҳукумати Ҷумҳурии Тоҷикистон дар минтақаҳо инфрасохтори зарурии сайёҳӣ бунёд гардида истодааст, ки барои ҷалби бештари сайёҳон, баланд бардоштани сатҳи некуҳволии минтақаҳои деҳот ва пайдо гардидани ҷойҳои навӣ корӣ ва дар маҷмӯъ, рушди устувори сайёҳӣ дар мамлакат заминаи мусоид фароҳам меорад.

Дар ин лаҳзаҳои фараҳбахш Шуморо ҳамватанони иззатманд бо фарорасии Соли нави мелодии 2026 сидқан таҳният гуфта, бароятон пеш аз ҳама тандурустиву иқболи нек, ба хонадонатон файзу баракат ва ба Тоҷикистони озоду соҳибистиқлоламон ободиву пешрафти ҳамешагӣ орзу менамоям.

Соли нави мелодии 2026 муборак!