1 сентябр мулоқоти кории Раиси Кумитаи рушди сайёҳӣ назди Ҳукумати Ҷумҳурии Тоҷикистон Ҷамшед Ҷумахонзода бо Намояндаи тиҷоратии Федератсияи Россия Александр Рыбас баргузор гардид.

Мавзӯи асосии музокирот баррасии вазъ ва дурнамои рушди минбаъдаи соҳаи сайҳӣ, инчунин таҳкими ҳамкориҳои дуҷониба дар ин самт ба ҳисоб меравад..

Зимни мулоқот раис Кумита оид ба афзоиши устувори ҳарсолаи ҷараёни сайёҳон аз Россия ишора намуда, изҳори умедворӣ кард, ки ин раванд дар оянда низ идома меёбад.

Таъкид гардиб, ки Ҷумҳурии Тоҷикистон на танҳо ба зиёд шудани шумораи сайёҳон аз Федератсияи Россия, балки ба рушди ҳамкориҳои сармоягузорӣ бо ширкатҳои русӣ ва мубодилаи таҷрибаи мақомоти давлатӣ ва мутахассисони соҳаи сайёҳӣ низ манфиатдор аст.

Аз навбати худ Александр Рыбас бо баҳогузории мусбати тамоюли ташрифи сайёҳон аз Россия ва дигар кишварҳо ба Тоҷикистон истиқбол намуда, манфиатдории ҷониби русиро ба таҳкими ҳамкорӣ тасдиқ намуд. Ӯ махсусан дурнамои татбиқи лоиҳаҳои муштараки инфрасохториро дар қаламрави Тоҷикистон таъкид кард.

Ба масъалаҳои баланд бардоштани шинохт ва муаррифии ҷозибаи нодири сайёҳии Тоҷикистон ва имконияти ташкили лоиҳаҳои муштараки расонаӣ бо ҷалби блогерҳо ва шахсиятҳои маъруфи рус низ таваҷҷуҳи хос зоҳир карда шуд.

Дар поёни мулоқот тарафҳо оид ба ҳамкории наздик ҷиҳати амалӣ намудани тавофуқҳои ҳосилшуда ва ташкили кори муштарак баҳри ҷалби доираҳои тиҷоратии Россия ба татбиқи лоиҳаҳои сармоягузорӣ дар соҳаи сайёҳӣ мувофиқа намуданд.