Имрӯз, 13 августи соли 2025, мулоцоти Раиси Кумитаи рушди сайёҳии назди Ҳукумати Ҷумҳурии Тоҷикистон Ҷамшед Ҷумъахонзода бо роҳбари корҳои ташрифотӣ ва миаъмурии Щукумати Фландрияи Шоҳигарии Белгия Ҷилл Виллем Суетенс ва раиси ташкилоти сайёҳии ва академияи Via Via ҷаноби Боб Элсон баргузор гардид.

Зимни мулоқот ҷонибҳо доираи васеи масъалаҳоро оид ба рушди ҳамкориҳои дуҷониба дар бахши сайёҳӣ баррасӣ намуданд. Аз ҷумла, мавзуъҳои ташкили сафари блогерон, сайёҳони фаъол ва намояндагони воситаҳои ахбори оммаи Белгия ба Тоҷикистон, ҳадафмандона ташвиқу тарғиб намудани имкониятҳои сайёҳии кишвар дар бозори аврупоӣ, ҳамчунин таҳия ва паҳнсозии видеороликҳои таблиғотӣ дар шабакаҳои иҷтимоии Белгия дар маркази диққат қарор доштанд.

Зимни суханронӣ аз ҷониби раиси Кумитаи рушди сайёҳӣ қайд гардид, ки Тоҷикистон дорои иқтидори бузурги сайёҳӣ мебошад, ки он аз манзараҳои нодири кӯҳӣ, иқлими мусоид, мероси ғании таърихию фарҳангӣ ва анъанаҳои меҳмоннавозӣ сарчашма мегирад.

Қайд карда шуд, ки ташрифи блогерон ва намояндагони ВАО метавонад ба таври назаррас ба рушди имиҷи байналмилалии Тоҷикистон ва ҷалби бештари сайёҳон аз кишварҳои аврупоӣ мусоидат намояд.

Ҷаноби Ҷилл Виллем Суетенс ва ҷаноби Боб Элсон омодагии худро барои ҳамкории фаъол дар татбиқи лоиҳаҳои муштарак, аз ҷумла ташкили чорабиниҳои таблиғотӣ, намоишгоҳҳо ва барномаҳои таблиғотӣ иброз доштанд.

Дар анҷоми мулоқот ҷонибҳо изҳори умедворӣ намуданд, ки ин ташаббусҳо на танҳо ба рушди ҳамкориҳои байни Тоҷикистону Белгия дар соҳаи сайёҳӣ мусоидат мекунанд, балки ба таҳкими робитаҳои фарҳангӣ ва муаррифии симои мусбати Тоҷикистон дар арсаи байналмилалӣ низ замина мегузоранд.