Рӯзи 15 ноябри соли 2024 дар бинои Кумита вохӯрии Сардори Раёсати хизматрасонӣ дар соҳаи сайёҳии Кумитаи рушди сайёҳӣ Зафарзода Комрон бо намояндагони соҳаи сайёҳии Ҷумҳурии Исломии Эрон, ки бо роҳбарии Беҳдод Қанбарнажод ба Ҷумҳурии Тоҷикистон ташриф оварданд, баргузор гардид.

Дар оғоз сардори раёсати хизматрасонӣ дар соҳаи сайёҳии Кумита оид ба зарфиятҳои сайёҳии кишвар, хусусан сайёҳии экологӣ, солимгардонӣ, кишоварзӣ ва шикор дар Ҷумҳурии Тоҷикистон ба ҷониби эронӣ маълумот дода, ба роҳ мондани ҳамкориҳоро дар самти сайёҳӣ байни ширкатҳои сайёҳии Ҷумҳурии Тоҷикистон ва Ҷумҳуриии Исломии Эрон ҷиҳати зиёд намудани сайёҳон муҳим арзёбӣ намуд.

Сипас ҷониби эронӣ иброз намуд, ки Ҷумҳурии Тоҷикистон бо доштани фарҳанг, таърих, урфу одат, забон, табиат ва хурокҳои миллии худ дар Осиёи Марказӣ фарқкунанда буда, барои сайёҳони эронӣ боиси диққат ва тавваҷуҳи хос мегардад. Ҳамзамон ҷониби эронӣ қайд намуд, ки Иди байналмилалии Наврӯз тавваҷуҳи сайёҳони эрониро рӯз то рӯз зиёд намуда, қабул гардидани санади ҳамкорӣ барои лағви раводид заминагузор барои зиёд намудани сайёҳон аз ҳардуҷониб гардида истодааст.

Дар анҷоми вохӯрӣ ҷонибҳо масъалаҳо доир ба ташрифи ҳайати ҳардуҷониб ба кишварҳои ҳамдигар ҷиҳати омӯзиши таҷриба, боздид намудан аз имкониятҳои сайёҳӣ, иштирок дар намоишгоҳҳои дар самти сайёҳӣ, ки дар кишварҳои ҳамдигар баргузор мегарданд ва ба роҳ мондани хатсайрҳои нави сайёҳиро ҷиҳати зиёд намудани гардишгарон мавриди баррасӣ қарор доданд.