Дар доираи сафари корӣ ба вилояти Свердловски Федератсияи Россия 30 октябри соли 2024 раиси Кумитаи рушди сайёҳии назди Ҳукумати Ҷумҳурии Тоҷикистон муҳтарам Камолиддин Муминзод бо раиси Ассотсиатсияи сайёҳии Урал ҷаноби Михаил Мальцев мулоқот анҷом дод.

Дар мулоқот атрофи масъалаҳои густариши муносибатҳои дуҷониба дар соҳаи сайёҳӣ, робитаи ҳамкориҳо байни ширкатҳои сайёҳии дуҷониб ва омӯзиши таҷрибаи Федератсия Россия аз ҷумла, вилояти Свердловск ва ҷалби сайёҳону сармоягузорон дар ин самт табодули афкор сурат гирифт.

Ҳамзамон, масоили истифодаи самараноки беҳтарин таҷрибаҳои Федератсияи Россия оид ба пешбурди соҳаи сайёҳии кишвар дар самти хизматрасонӣ ва ба роҳ мондани хатсайрҳои сайёҳӣ ва мубодилаи сайёҳони байни ду кишвар баррасӣ гардид.

Инчунин, ҷонибҳо бо инобати зиёд будани зарфиятҳои сайёҳӣ дар ҳарду кишвар барои бозҳам зиёд намудани шумораи гардишгарон аз ҳарду ҷониб баимзорасонии санадҳои нави ҳамкориро бо ширкатҳои сайёҳӣ ва мақомотҳои дахлдор баррасӣ намуданд.

Мулоқот дар фазои ҳамдигарфаҳмӣ ва ҳусни тафоҳум ба анҷом расид.