Президенти Ҷумҳурии Тоҷикистон муҳтарам Эмомалӣ Раҳмон имрӯз дар мулоқот бо роҳбарон ва фаъолони Вилояти Мухтори Кӯҳистони Бадахшон иброз доштанд, ки мувофиқи маълумоти оморӣ, соли 2023 ва дар шаш моҳи соли 2024 ба Вилояти Мухтори Кӯҳистони Бадахшон ҳамагӣ 50 ҳазор сайёҳони хориҷӣ омадаанд, ки хеле кам аст.

Сарвари давлат хотирнишон намуданд, ки Вилояти Мухтори Кӯҳистони Бадахшон яке аз маконҳои бисёр ҷолиб барои сайёҳони дохиливу хориҷӣ мебошад. Манзараҳои табиии зебову нотакрор, шаршараву дарёҳо ва кӯлҳои беназир, пиряхҳои калонтарин ва қуллаҳои баландтарин, меваҳои шаҳдбор ва маҳсулоти ширию гӯштии аз лиҳози экологӣ тоза, ҳазорҳо намуд гиёҳҳои шифобахшу даҳҳо чашмаи табобатӣ ва олами набототу ҳайвоноти нодир аз ҷумлаи имконоти беҳтарин барои рушди сайёҳӣ дар вилоят мебошанд.

-Инчунин ёдгориҳои таърихиву фарҳангӣ ва расму ойинҳои рангоранги миллӣ, ки дар Вилояти Мухтори Кӯҳистони Бадахшон мавҷуд ҳастанд, таваҷҷуҳи ҳазорон сайёҳонро аз давлатҳои гуногуни олам ҷалб кардаанд,- таъкид намуданд Пешвои миллат

Дар ин замина Роҳбари давлат бо нигаронӣ иброз намуданд, ки имконоти вилоят дар ин самт ҳанӯз ба таври кофӣ истифода намегарданд. Ин аз ҷониби вазорату идораҳои дахлдор, роҳбарияти вилоят ва шаҳру ноҳияҳои он андешидани тадбирҳои заруриро тақозо менамояд.

Вобаста ба ин масъала Сарвари давлат дастур доданд, ки роҳбарони мақомоти иҷроияи ҳокимияти давлатии вилоят ва шаҳру ноҳияҳои он дар ҳамкорӣ бо Вазорати рушди иқтисод ва савдо, Кумитаи рушди сайёҳӣ ва дигар вазорату идораҳои дахлдорро зарур аст Барномаи рушди соҳаи сайёҳӣ дар Вилояти Мухтори Кӯҳистони Бадахшонро таҳия ва амалӣ намоянд.

Сарчашма: АМИТ «Ховар»