25 июни соли 2024 дар маҷлисгоҳи Кумитаи рушди сайёҳии назди Ҳукумати Ҷумҳурии Тоҷикистон вохурии муовини раиси Кумита Салимзода Зиёулло бо намояндагони ширкати VISA-и Амрико Жанна Дюссембина – Директор оид ба робита бо мақомотҳои давлатӣ дар Осиёи Миёна, Антон Бороздин – Директори калон оид ба рушди тиҷорат дар кишварҳои Осиёи Марказӣ ва Суҳроб Факиров – Менеҷери рушди тиҷоратӣ дар Тоҷикистон доир гардид.

Ҷонибҳо зимни вохурӣ вобаста ба масъалаҳои роҳандозии хизматрасониҳои рақамӣ ва ғайринақдӣ тавассути низоми кортҳои байналмилалӣ дар хизматрасониҳои сайёҳии Ҷумҳурии Тоҷикистон табодули афкор намуданд.

Маврид ба зикр аст, кортҳои Visa барои пардохт дар нуқтаҳои савдо дар зиёда аз 200 кишвари ҷаҳон қабул карда мешаванд.

Ташкилот дар таҳияи маҳсулот ва технологияҳои инноватсионии пардохт, ки аз ҷониби 15,500 муассисаҳои молиявӣ истифода мешаванд, нақши марказӣ мебозад.

Рушди ҳамкориҳо бо ширкатҳои ҷаҳонии ҳамсон барои таъмини рушди босуботи соҳаи сайёҳии мамлакат ва пешниҳоди хизматрасониҳои сатҳи байналмилалӣ мусоидат менамояд.

Вохурӣ дар фазои ҳамдигарфаҳмӣ ва ҳусни тафоҳум анҷом ёфт.