Имконияти сайёҳии Тоҷикистон дар ЭКСПО-и сайёҳии Ҷопон 2023, ки дар шаҳри Осакаи Ҷопон аз санаи 26 то 29 октябри осли 2023 баргузор мегардад, ба намоиш гузошта шуд.

Дар намоишгоҳ ҳайати кормандони Кумитаи рушди сайёҳӣ ва ширкатҳои сайёҳӣ иштирок намуда, зарфиятҳои сайёҳии Ҷумҳурии Тоҷикистон ба маърази тамошои мпеҳмонон ва иштирокдорони намоишгоҳ пешкаш намуданд.

Маросими ифтитоҳии бахши гӯшаи Осиёи Марказӣ 26 октябр доир гардид, ки дар он намояндагони Сафорати Тоҷикистон дар Ҷопон  ширкат намуданд. Роҳбарони ҳайатҳои расмии мамлакатҳои Осиёи Марказӣ бо сухани ифтитоҳӣ ба кори бахши Осиёи Марказӣ оғоз бахшиданд. Дар ин бахш панҷ кишвари Осиёи Марказӣ гӯшаҳои худро бо маводи таблиғотӣ ва анҷому хӯроквориҳои миллӣ ороиш дода, ба намоиш гузоштанд. Гӯшаи Тоҷикистон низ бо истифода аз маводи таблиғотии сайёҳӣ, меваҷоти хушк ва сарулибоси миллии тоҷикӣ оро ёфта буд.

Бо ибтикор ва дастгирии молиявии Агентии Ҷопон оид ба ҳамкории байналмилалӣ (JICA) бахши муштараки кишварҳои Осиёи Миёна дар доираи ЭКСПО-и сайёҳии Ҷопон 2023 омода гардид.

ЭКСПО-и сайёҳии Ҷопон 2023 аз ҷониби ширкат ва ассотсиятсияҳои бузурги ҷопонӣ Japan Travel and Tourism Association (JTTA), Japan Association of Travel Agents (JATA) ва Japan National Tourism Organization (JNTO) ташкил шудааст. Tourism EXPO Japan чорабинии фарогири тиҷорати сайёҳӣ буда, кишварҳои калидӣ дар соҳаи ҷаҳонии гардишгарӣ ва сайёҳонро муттаҳид мекунад. Дар доираи ин чорабинӣ вохӯриҳои корӣ, мубодила, мубоҳисаҳо ва таблиғоти мустақим миёни ширкатҳо ва мизоҷон доир мегарданд.