15 октябр дар ҳошияи таҷлили Иди ниёгони Меҳргон, ки дар боғи фарҳангӣ-фароғатии ба номи Аблуқосим Фирдавсӣ баргузор мегардад, имкониятҳои сайёҳии кишвар ба намоиш гузошта шуданд.

Дар ин намоиш намояндагони Дастгоҳи иҷроияи Президенти Ҷумҳурии Тоҷикистон, вазорату идораҳо, Донишкадаи аграрии Тоҷикистон ва фаъолони вилоятҳои Хатлон, Бадахшон, Суғд ва ноҳияҳои тобеи ҷумҳурӣ иштирок менамоянд.

Аз ҷониби Кумитаи рушди сайёҳии назди Ҳукумати Ҷумҳурии Тоҷикистон дар якҷоягӣ бо дигар сохторҳои марбутаи ҷумҳурӣ ба муносибати таҷлили Иди Меҳргон гушаи сайёҳӣ ташкил карда шуд.

Дар гушаи мазкур имкониятҳои сайёҳии аграрӣ, сайёҳии табобатӣ ва солигардонӣ ва сайёҳии куҳнавардӣ ба маърази тамошои меҳмонон гузошта шудааст.

Дар фарҷоми чорабинӣ барои иштироки фаъолона ва ташкили гушаи намунавӣ аз ҷониби Вазорати кишоварзии Ҷумҳурии Тоҷикистон ба Кумитаи рушди сайёҳии назди Ҳукумати Ҷумҳурии Тоҷикистон сипоснома тақдим карда шуд.

Тибқи Қарори Ҳукумати Ҷумҳурии Тоҷикистон аз 5 августи соли 2009 дар ҷумҳурӣ Иди Меҳргон чун иди миллӣ таҷлил карда мешавад.

Меҳргон ҳамасола дар саросари ҷумҳурӣ таҷлил гардида, мисли ҷашнҳои таърихии Наврӯз, Сада, Тиргон ва ғайраҳо аз қадимтарин идҳои миллии мардуми мо маҳсуб мешавад.

Чуноне, ки Президенти мамлакат муҳтарам Эмомалӣ Раҳмон дар суханрониҳояшон таъкид менамоянд: «Меҳргон ба монанди Наврӯз таҷассуми суннатҳои неки инсонист, ки файзу баракати хони пурнеъмати кишоварзонро инъикос менамояд. Бинобар ин, зарур аст, ки он ҳар сол бо шукӯҳу шаҳомати хосса таҷлил карда шавад.

Аз ин хотир, анъанаву расму ойини хос ва фарҳанги ғании мардуми тоҷик, ки аз қадимулайём бо замин сару кор доштанд ва соҳиби маданияти баланди заминдорӣ буданд, то имрӯз боқӣ монда, ҳамчун ҷузъи таркибии тамаддуни умумибашарӣ барои инсоният хизмат менамояд».