Имрӯз дар шаҳри Душанбе маросими ҷоизасупорӣ ба ғолибони Ҷоизаи Ҳукумати Ҷумҳурии Тоҷикистон дар соҳаи сайёҳӣ ва озмунҳои ҷумҳуриявӣ дар самти сайёҳӣ баргузор гардид.

Дар чорабинии мазкур муовини Сарвазири Ҷумҳурии Тоҷикистон Дилрабо Мансурӣ, роҳбарияти Кумитаи рушди сайёҳӣ, намояндагони вазорату идораҳои дахлдор, ширкатҳои сайёҳӣ, коршиносони соҳа, намояндагони воситаҳои ахбори омма ва устодону донишҷӯёни риштаи сайёҳии макотиби таҳсилоти олии кишвар иштирок доштанд.

Мақсад аз баргузор намудани чорабинӣ пеш аз ҳама ҳавасмандгардонии субъектҳои хизматрасони соҳа ва доираҳои сайёҳӣ мебошад.

Ҷоизаи Ҳукумати Ҷумҳурии Тоҷикистон дар соҳаи сайёҳи аз рӯйи шаш номинатсия:

– барои дастоварди беҳтарин дар рушди сайёҳии дохилӣ;

– барои дастоварди беҳтарин дар рушди сайёҳии байналмилалӣ;

– барои сармоягузори беҳтарин дар соҳаи сайёҳӣ;

– барои навовари беҳтарин дар соҳаи сайёҳӣ;

– барои кори илмӣ (тадқиқотӣ) – и беҳтарин дар соҳаи сайёҳӣ;

– барои дастоварди беҳтарин дар таблиғи маҳсулоти сайёҳии Ҷумҳурии Тоҷикистон ҷамъбаст гардид.

Озмун барои беҳтарин субъектҳои хизматрасонӣ дар соҳаи сайёҳӣ аз рӯйи панҷ номинатсия:

– беҳтарин ширкати сайёҳӣ;

– беҳтарин меҳмонхона;

– беҳтарин тарабхона;

– беҳтарин роҳбалад;

– беҳтарин блогер ва тарғибгар тавассути сомонаҳо дар дохил ва хориҷи кишвар ҷамъбаст гардида, ғолибони озмунҳои болозикр аз ҷониби Кумитаи рушди сайёҳӣ бо диплом ва ҳавасмандкунии молиявӣ сарфароз гардонида шуданд.

Қобили қайд аст, ки дар доираи ҳамоиши мазкур замимаи барномаи мобилӣ барои дӯстдорони сайру саёҳати Тоҷикистон зери унвони “Tourism Map of Tajikistan” муаррифӣ гардид.