Аз шумораи умумии сайёҳоне, ки соли 2024 ба Тоҷикистон омадаанд, ҳудуди 60% ё 840 ҳазор нафар аз шаҳри Душанбе будаанд. Дар ин бора ба хабарнигори АМИТ «Ховар» сардори шуъбаи рушди сайёҳии Мақомоти иҷроияи ҳокимияти давлатии шаҳри Душанбе Дилшоди Ҷамшед хабар дод.

Вай зикр кард, ки тавассути гузаргоҳҳои марзӣ дар ҳудуди шаҳри Душанбе, яъне танҳо тавассути гузаргоҳҳои марзии Фурудгоҳи байналмилалии Душанбе ва Роҳи оҳани Тоҷикистон то 20 декабри соли 2024 247 440 нафар ба сифати сайёҳ ба шаҳри Душанбе ворид шудаанд.

Ин тақрибан 18 ҳазору 283 нафар ё 13,5% зиёдтар нисбат ба ҳамин давраи соли 2023 аст.

Дилшоди Ҷамшед ҳамчунин хабар дод, ки имрӯз дар шаҳри Душанбе фурудгоҳи байналмилалӣ, вокзал, автовокзал, 50 меҳмонхонаи бисёрошёна, 118 тарабхона, 4 адад миллӣ чойхона, 39 маркази фароғатӣ, 27 бозор, 125 маркази савдо, 30 дӯкони армуғон, 4 майдони чорабиниҳои фарҳангӣ, 17 боғи фарҳангу фароғат, 1 боғи ҳайвонот, 44 майдонча, 5 кӯл барои шиноварӣ ва фароғат, 67 толори варзишӣ, 210 кошонаи ҳусн ва 198 сартарошхона, 4 қасри фарҳанг, 7 театри касбӣ, 11 осорхона, 17 китобхона, 6 амфитеатр, 23 ёдгориҳои бостонӣ ва меъморӣ, 94 ширкати сайёҳӣ, фаввораҳо дар 38 ҷои пойтахт, 378 майдончаҳои варзишии кӯдакона, 306 муассисаи табобатию профилактикӣ, 77 устохонаи ҳунарӣ, Қасри теннис ва Маҷмааи варзиши обӣ ва Маҷмааи «Истиқлол», ки ҳамарӯза ба меҳмонони ватаниву хориҷӣ хизмат мерасонанд.