Дар доираи сафари ҳайати Тоҷикистон ба Гуриҷстон ҷиҳати омӯзиши таҷрибаи сайёҳии ин кишвар 12 августи соли 2024 мулоқоти Камолиддин Муминзод – Раиси Кумитаи рушди сайёҳии назди Ҳукумати Ҷумҳурии Тоҷикистон бо раиси шаҳри Батуми – Арчил Чиковани ва роҳбарияти Департаменти сайёҳии шаҳрии Батумии Гурҷистон баргузор гардид.

Ҳангоми мулоқот ҷониби гурҷӣ суханро оғоз бахшида, сафари ҳайати Тоҷикистонро ба Гурҷистон ҷиҳати тақвият бахшидани муносибатҳои дуҷониба ва зиёд намуани гардишагрон аз ҳардуҷониб муҳим арзёбӣ намуд.

Дар рафти вохӯрӣ Раиси Кумита оид ба мавҷудияти имкониятҳои фаровони сайёҳӣ, хусусан сайёҳии экологӣ, солимгардонӣ, кишоварзӣ ва шикор дар Ҷумҳурии Тоҷикистон маълумот дода, сиёсати созанда ва дурбинонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар мавриди ноил гаштан ба дастовардҳои беназири соҳаи сайёҳӣ дар даврони соҳибистиқлолӣ бисёр муҳим архёбӣ намуд.

Ҳамзамон, дар мулоқот атрофи масъалаҳои густариши муносибатҳои дуҷониба дар соҳаи сайёҳӣ, робитаи ҳамкориҳо байни ширкатҳои сайёҳии дуҷониб ва масоили омӯзиши истифодаи самаранокии беҳтарин таҷрибаи Гурҷистон оид ба пешбурди соҳаи сайёҳии кишвар дар самти хизматрасонӣ ва мубодилаи сайёҳони байни ду кишвар баррасӣ гардид.

Дар анҷоми вохӯрӣ тарафҳо ҳавасмандии худро барои ҳамкориҳои судманд ва мустаҳкам намудани дӯстӣ, баланд бардоштани сатҳи иқтисодӣ дар рушди сайёҳӣ иброз намуданд.